De Limericks...

 

...vun Claus Günther  

Harvstmaand 2005: Claus Günther sin Book is dor

De glückliche Geboort vun en lüttjet Book schall hüüt mol künnig mokt warrn. Rutbrocht hett dat de Quickborn-Verlag in Hamborg ünner den scheunen Nomen "Limericks Plattdüütsch". Jedereen kann sik dat nu ankieken un ok käupen för 6,60 Euro — bi all de Bookhannelslüüd, de darvun wat op Vörrat hebbt. In'n Internet kann een dat finnen ünner www.quickborn-verlag.de/291.html.

In dat Book hett Claus sik an dat klassische Limerick-Thema hollen, bi dat en Oortsnaam vörkamen schall, op't best an't Enn vun de eerste Reeg. De Limericks, de hier nu wedder stahn dröfft, staht ok alle in dat Book.

 

Dat gifft en Boutique dor in Wedel,
saudüer un echt "edel-edel".
Sogor poor Chinesen
sünd dor al wesen:
"Wil swälmen fül Lack un fül Ledel!"

 

   

In Meldörp beseuk ik in'n Droom
den stolten Dithmarscher Dom.
Bito ruuscht dat Meer…
(Ik heur dat, op Ehr!)
Wenn'k opwok, pack ik mien Kroom.

 

 

Dat geev mol en Jungfro in Stood,
de weer sik för Mannslüüd to schood.
Se dee sik bewohren
un lev achtig Johren.
As Jungfro weer se ut de Mood.

 

   

Marieken dreep mol in Sande
een vun de Geldschappknack-Bande —
un trock mit em af!
De weer villicht baff...
(Man Löcker opbohren — dat kann de!)

 

 

En Naschmuul vun Fro in Scharbeut-z,
de jank rein egalweg na Seut-z.
Ehrn Mann mook se arm.
Man he mook op Charm'
un anter: "Klei di an de Feut-z!"

 

   

En Macker wahnt in Winterhude,
de see to en Deern: "Küss mi, Trude!"
Doch se anter: "Wer da?
Du Moors, ik heet Gerda!"
Dor verkroop he sik in siene Bude.

 

Ik heff vun en Deern dröömt ut Klecken,
de leev dat, sik heel ut-to-trecken.
Ik ei grood ehrn Liev,
dor sleug dat Klock fief,
un mien Ollsch steut mi an, mi to wecken.

 

En osigen Schietkeerl ut Maschen
weer scharp op, sien Deern to vernaschen.
He smiet ehr op't Bett.
Se stöhn: "Oh, wat nett!
Du Swienjack — wat höllst du vun Waschen?"

 


...vun Hans Jörg Hartmann  

Dar weer mal en Jung bi de Pütten
darbi, jümmerto rintospütten.
Nah'n Stünnstied orrer twee,
dar seggt he: "Ik seh —
de Pütten war'n vull so bilütten!"

 

En Klockenmaaker ut Wesselbuuren
weer et leed, lang op Kundschaap to luuren.
Wat schull he bloot maaken?
"Ik verschenkt all mien Klocken
und leev af denn vun de Reparatuuren!"

 

De Landfruunsvereen vun Pellworm
fahrt dreemal in't Jahr na Benidorm.
Dar bedroogen se ehr dröögen Pellwormers
mit so'n schieren, glatten Benidormers —
und keem vergnöögt torügg na Pellworm.


...vun Marlou Lessing  

En oles Postüür vun'e Geest
weer al mehr as to Hälfte verweest,
man se greep sik en Mann
un stöhn "Maak mi an!"
Dat harr se in'n Schundromaan leest.

 

En Fuulpuup — he wahn in Niemünster —
dä nix un keek bloots ut sin Finster
op de Straat, Dag un Nacht.
Na Klock twölf, wenn he wacht,
loopt buten man bloots noch Gespinster.

 

En mollige Lady ut Grimmen
fung an, sik op Slankheit to trimmen
in't Kraftstudio.
— Annerletzt kreeg se so
as "Miss Universum" teihn Stimmen.

 

"Dor weer mol en Fruunsminsch in Schwansen,
de much för ehr Leven geern dansen.
Se dans ganz alleen
op de achtersten Been…"
— Nu tühnst du doch woll, Mudder Hansen?

 

En Ossenheerd in Hohenwestedt
wull nich slacht't warrn un fast't, schoonst se mästet.
Sä de Buur: "Wat'n Plie!
BSE hebbt de nie!
BSE-free — controlled and tested".

 

En Frömdenföhrer op Föhr
föhr Frömde, je lever, je mehr.
Na bleev vun elk Tuur
bloots en matschige Spur:
He föhr ehr man drievens in't Meer.

 

De Rottenfanger vun Hameln
harr dat Tüüch, Gnaagdeerten to sameln.
Dat Entsorgen in de Weser
is vörbi, leve Leser:
hüüt mööt se an't Över vergameln.

 

En hoochdüütsche Lover op Öhe,
de swöög jümmers "Wönn öch döch söhe…"
"Dat muttst noch mal öven.
Ik kann di nich löven!"
Schoonst he stöhn, "Erhör möch, öch flöhe…!"

 

En clevere Lady ut Damp
dreeg jümmers high heels, as'n Vamp.
Vun Stahl weern de Schoh
un de Been glieks dorto!
So kreeg se ehr Leevdaag keen Kramp.

 

En Udel ut Probsteierhagen
wull den "Kampf mit de Mafia" wagen.
He woor jaagt, staats to jagen,
un se kidnappt sin Blagen —
so keem he üm Kopp un üm Kragen.

 

Op en Afschussramp bi Bederkesa
sitt Hein as Rakeet — en ganz Böser.
Butenop, leve Leser,
steiht nich "NASA", nich "ESA",
nee, dor steiht: "Scheet in'n Wind! Hartlich, Gesa."

 

En PC mit en Server in M
weer verleevt un wull Sexverkehr hemm
över ISDN.
He geneet dat, bet denn
em de Server mit Spam överswemm.

Nota bene: "M" is natüürlich "Emden" — de eenzige Stadt weltwiet,
de ehr Naam bloots 1 Bookstaav hett :-)

En tragischen Limerick:

En Deern mit ehrn Leevsten in Marne
de swiester in'n Slaap "Leevste Arne!"
Man ehr Keerl, de heet Sven.
He höör dat, güng hen
un hangt nu an de neegste Latarne.

 

En malle Geniekopp ut Achim
slööp nienich, leeg nachtens bloots wachim
un spröök vör sik her:
"Toorn sleit op e4!"
— In'n Geist speel he mit sik sülvst Schachim...

 

En Wunder-Limerick

Vun vörletzten Fasching de Plünns,
de kniept an de Hüfte upstünns.
Na dat is ja bitter!
Wat maak se so lütter?!
De Plünn hebbt sachs fastet. Wat sünst?

 


...vun Peter Perrey  

Een Deern — vun de söten, de suern ? —
Deit op een Naricht woll luern.
Höpt för een Breef üm half teihn —
Kann de Postbüdel ni seihn...
Ja, nu warrt dat Luern wat duern!

 

Ik weet üm een Meester uut Husen,
Den köönt siene Deerns nie verknusen.
Dat is di'n Knecht,
Kümmt mit sien Drift nie torecht.
Se bangt jem üm'n Moors un ehr'n Busen.

 

Slaag in! Dit Woort wüllt wi geven:
Wi snackt Platt, denn Plattdüütsch schall leven!
Laat us dat praten un kören
Mit de Oolen, de Gören:
Us Noord mutt nedderdüütsch bleven!

 

Anna Krüger, se leeft in Laboe,
Fröög in'n Tooch: "Fahrt wi hier na Itz'hö?"
Reet een Macker sien Snuut:
"Door muttst wedder ruut.
Wi fahrt na Itzehoe un ni na Itz'hö!"

Peter Perrey schrifft dorto:
Dat is mien Groottant wiss un wahrhaftig
vöör 50 Jahren passeert!

"Na Mannke," seggt Ernst uut Darkehme,
"Komm, laat uns e Pillkaller nehme:
E beetke Mostrich op Worscht
On e Koorn fer e Dorscht —
Nur e Flasch, sonst kennst di jewehne!"

Peter Perrey schrifft dorto:
Dat is up ostpreußsch Nedderdüütsch (maal wat anners). Daar hebbt se den Diminutiv geern (-ke) un de Umluut warrn "entrundet" (ö > e; ü > i). Darkehmen weer een Ortsnaam; Pillkaller is wat to supen: Koorn met Lebberwust up dat Glas un een beten Semp daarup. Muttst maal probeern!

 

Vun dat 'Landtrampel', daar laat em reden;
Wat sik leef hett, dat brüdt sik in't Lewen.
Datt weer as een Signaal:
"Du büst mi gaarni egaal!"
Süh, een Söten kunn he ni glieks geven.

 

Daar weer maal fief Blagen uut M'n,
Wult jem Tiet in'n Kinnergoorn been'n.
Weet, de Öllern sünd verdwars
Un deep vertütelt in'n Pisa-Knarrs.
Nu nömt's sik — as in Amerika — Studen'n!

(Mit M'n is ok hier Emden meent!)

 

Ik weet üm een Muskant uut Luth',
Is de Macker vun een oold Fooln-Snuut.
Se will em dat lohnen,
Kakt Arften un Bohnen —
He speelt Piano un se nu de Tuut.

 

"Verdori!" so röppt Sinter Claas,
"Dör'n Schosteen, dat is een Spaaß!"
Man hüüt driggt he düütsch Plünn'n,
Nimmt de Grootdöör na binn'n
Un as de Wiehnachtsmann is he nu Baas.

 

Sluderee

Gesche hört vun en Fruunsminsch ut Plön,
Dat de leev hett en Kerl un sien Söhn.
"Woans kann dat bloots gahn?
Dat Wief schall sik wat scham'n!"
Nu mal sacht: Dat's de beiden ehr Möhm!


Trüch an Bord

Bi de grau Dampers, geihst du an Bord,
Fleuten se Sied, un dat nich to kort.
"Melde Herrn Kaptein:
Bannig good, Se to seihn!"
Mien Jung, ik glööv di keen Wort!

 

 
 

En Dödel ut Wrestedt in'e Heid'
As'n Pennschieter kennt bloots en Freid,
Sien Geller to tellen
Un denn stolt to vermellen:
"Ik bün kloog un de Deerns jümms utneiht!"

 

Daar weer en plietsch Deern ut'n Norden,
De maakt de Watermeng Sorgen.
Is daar Schiet binn'n, Nitrat?
Wat höllt de Tokumst praat?
Se funn: Wi suupt noog, ok noch morgen.

 

 

...vun Ute Biemüller  

Een Wittfru ut Volsemerhusen,
de söch sik 'n Mann, blots to'n Schmusen.
Se harr ok en funnen.
Verleev mit em scheune Stunnen!
Em sien Fru, de kunn't nich verknusen.

 


Maxi & Morix...vun Martin Botsch

De Protagonisten in düsse Limerix sünd Martin Botsch sin twee Loop-Aanten, Maxi un Morix (süh Biller).

Twee Aanten, naamd Maxi un Morix,
De hölt vun dat Ies in’n Pool gornix.
De tövd ahn Geduld
Up den Fröhling. Se wullt
fix paddeln un schnaddeln — na klorix!

 

De Maxi un Morix ut Herrnbörch
de pedd op ehr Plattfööt so geern dörch
den Goorn, quackelt sööt,
op Platt, as ehr Fööt...
Och güng doch de Vagelgripp feern dörch!

 

För Fleegdeerten herrscht opstunns Stallplicht,
na de ji juuch nipp överall richt.
Un wi? Dat sühst nau:
Mit Flegen is't mau!
De Stallplicht gellt so in uns Fall nicht.

 

Pira mit de WiehnachtskappDat vigelinsche Fröhjohr tweedusendsöß

Lütt Pira vun't Hüsing an'n Woold
is vör Oostern an'n Kopp noch to kold,
drecht de Wiehnachtsmann-Kapp!
Oosterhaas lacht sik slapp!
Of he sik bet Oostern verhoolt?

(Tostannkamen ünner Mitdoon vun Marlou)

 

 

Matten de Maler

Lütt Matten bi Schwansee an'n Strand
maalt meerstendeels See un ok Sand.
He kann nich abstrakt,
— ok nich mal bi'n Akt —,
süß wer he as Maler bekannt.

 

Vun Marlou in dat Kamp mit de Trappen
kannst mennicheen Dummtüch opsnappen.
Ick wull ick kun leern
vun de swienplietsche Deern.
Man mit min Bregen will dat nich klappen.

Verklaarn vun Marlou Lessing:
Dat is op mi seggt, ik wahn nämli in Trappenkamp :-)

  Limerick vun Klütz

Dor weer een lütt Deern mol in Klütz
De weer ok as Model nix nütz
Un ünner eer Mütz
Weer ok nich veel Grütz.
In'n Buk miteens föhlt se wat Lütts.

 

De Summer de is dor

Dor spaddelt de Geelfisch bi Matten in'n Diek
mit eer Snuten na baven hürt se sin Musik.
Oder dot se blots hiemen
för Luft in eer Kiemen
wildat Weder is bannig to heet för eer Riek?

 


...vun Karin Albrecht

 

 

Eheglück

Een lütter Koopmann in Stralsund
weigt över tweehunnertföftig Pund.
Sien Wief is sienesglieken,
Ok gatlich antokieken:
Beid' drall un prall un rund!

Un will'n in Leif se sick beglücken,
so is dat swor tohop to rücken.
Doch hebb'n se Kinner, Stücker fief,
ok all' kommod un gaut bi Lief.
(Wat so'n Lüüd woll an Äten verdrücken?)

 

   

Up'n Schaulhoff stahn ganz sülwstvergäten
ut de soebente Klass 'n Jung un 'n Mäten.
Gistern wiern s' noch lütte Butschers.
Süh — un hüüt "Weltklasse-Knutschers",
as wull eener den annern upfräten...

 

 

Uns' Opa will sien ümmer "trendy",
gistern köfft' he 'n brandnieges Handy.
Man, wie dat Ding funktioneert,
hett he vergäbens probeert un probeert...
Nu heit dat, leiw Olling: Gewenn di!


 
 

Limerick mit Schüddel-Anfang

In 'n Kauhstall up den Faudergang
gelüng de niege Katt 'n gauder Fang.
In 'ne Ritz harrn sick twee Müüs verstäken,
däden nie nich mit 'n Angrieper räken;
awer disse Katt wier vör de Käuh nich bang.

 

 

(Nach einer Sage)

Hebb'n ji all hürt von den Paster von Ziethen?
De deed ees de Anklamer Börgers "wat schieten".
He prädigte sünndags ümmer fien up Platt,
harr awer de upblasten Anklamers in Ziethen satt
un säd: "Hüüt gah 'ck na Huus! Amen, ji Anklamiten!"


28.10.07

Up't "Harry Potter"-Book, Band soeben,
hett de Welt 'ne lange Tied müsst töben.
Väle Fans föhln sick hüüt afmaracht,
Hebb'n läst un läst de ganze Nacht.
Un hebben't dörch, kuum to glöben...

           

...vun Erwin Holldorf

 

 
Heinz Meyer, de fischt an 'ne Bääg.
He freut sik op Wittfisch un Hääg.
De Proppen tuckt dol:
Biet Hääg orr en Aal?
— En Schoh, dat is allns, wat he krääg.
 
           

De Schüddelriemels...

...vun Marlou Lessing  

Wat Atze över den Hering sä

"Wenn't een geev, den ik frisch fünd!"
— He weer nu mal keen Fischfründ.

Atze, stell den Sabbel af
un lang mi mal den Appelsaf!

 

Mit en Freesennerz to singen

In'n Nevelmaand, wenn't schuern mütt,
wenn't över Dack un Muern schütt,
schall de, de över't Schuern muult,
dor hengahn, 'neem em
Muern schuult!

 

Opfeddern an en Rieken

Du ole Geldsack, schenk mal'n Dutz
Millionen för den Denkmalschutz!

 

De Schüddelriemel vun't Tofu-Gulasch

Fix eet sik Korl satt, wo ja
keen Tofu eten mag;
Miteens schreeg he: "Wat, Soja?!"
Rieklich bemeten, ach!

 

   
 

De schüchterne Kriegsheld

Bi't Strieden glänzt he, da ficht nix
em an, op sin Naam Sieg üm Sieg to frachten;
man bi de Deerns is he nicht fix,
se seggt: "He truut sik nix un friegt to sachten."

 

 

Sommeranfang

Wat Se en Heid orr Frommer sünd,
is nix, wat veel bedüüdt
;
Hauptsaak, se sünd en Sommerfründ!
De gifft hüüt sin Debut.

 

   

Keen Sülvstbedenen!

Lang nich eenfach na de Schinkenwust,
wenn du na den Kellner winken schust!

 

 

Atze is nich mit sik tofreden

"Geern weer ik Graf vun Luxenburg
orr Majestät, man so,
as 'k dösig ut de Buxen lurk,
warrt nix vun — seht man to!"

 

 

Drömen an'n Bugspriet

Un vör mi ünnern Steven liggt
de See, ut de dat Leven stiggt.

 

 

Du hest mi in min Kinnertied singen lehrt

Din Bild, din Stimm, de Töne Schall
steiht vör min binnern Oog,
un mennig Leed, en schöne Tall,
in min Erinnern-Book.

 

 

Mit Atze in't Restorang

He söcht sik ut de Spieskoort,
wat em an'n mehrsten Kies spoort.

 

 
  Astronomie in'n Harvst

Nehmt Teleskope und denn rut
in Feld un Stoppel, Deerns!
Un kiekt an't Himmelsrund denn ut
na niege Doppelsteerns!

 

 

Dat falsche Geschenk

Wat schall ik mit de schicke Deck?
Veel beter weer en dicke Scheck...

 

 

He meckert över't Eten

Wenn se nix Rechtes maken kann,
denn lehr doch sülven kaken, Mann!

 

 

Picknick mit lütte Kinner

Laat Metzen, Scheern un Lichter weg,
nimm avers rieklich Laken met.
Un sünd de lütten Wichter leck,
do allens, wat sik maken lett,
denn is eerstmal de Wickel natt,
nütt di keen Pumpernickel wat.

 

 
 

Schüddelballaad vun den verrückten Ravenjager

An'n Haverkamp in't Avendrood
leegn 25 Raven doot.
'neem kaamt all de Kadaver her?
— As ik mi na den Haver kehr,
sehg ik da Jan, den Jagersmann.
"Din Büüt is ja wat Magers, Jan!"
reep ik. "Wenn ik wat scheten do,

gifft't nich to'n Avendeten Schoh!"
reep he torüch. "Du Dümmerjan!
Dat heff ik doch al jümmer daan!

Mang Kohställ un de drögen Höff
gifft't nix, 'neem ik mi högen dröff!
Döösköpp as du, de dreihen Kot,
un ik scheet even Kreihen doot!"

Ik reep för dull: "Jan, wann du scheetst
to'n Spaaß, is dat en Schann, du weetst!"

Fix leeg he an — batz!, slöön de Schuss
un Blie in mi. — Nich schöön, de Sluss!

 

 

Komasupen

Wenn du en deegten Kater wist,
denn drink nich ut de Waterkist!
Un laat dat nich bi'n lütten Beer,
nee, suup de ganzen Bütten leer!

 

Produktmängel (De Ketchupbuddel geiht nich op)

Na'n Tied kümmt Hein in Woot un ritt
dat op. — Nu is he rood un witt.

 

Seeröverie

As ik ut de Kajüte lehn,
da fohrt da doch so lütte Kähn.
Batz, harr ik en tweischaten Ripp —
oha! Dat's en Piratenschipp.

 

De mexikaansche Süük

Dat Fever hooch, de Lippe gries —
keem nu de Swiens ehr Grippe lies?

 

Liese kriggt de Krise

To wenig is’t, wat Liese kriggt.
– Wat dat wohl an de Krise liggt?
An Bonusgeld de Banker hangt,
man Liese vör den Henker bangt.
Wenn’t eerst üm Brood un Botter geiht,
denn hülpt nich mal mehr Kottarbeit.
De Banken kriegt ehr hoog Malöör
betahlt. – Dat will ik ok mal, höör!
Un bloots den Autobu to redden
un sik süss sacht to Ruh to betten,
dat treckt noch mehr de Krise lang.
Al de Gedank maakt Liese krank.
Ok dat de Staat sik Miese lehnt,
as weern dat nix as Kinnerspilln,
daför much se de Spinner killn.
– Dat is tominnst, wat Liese meent.

 

To'n Sluss

Elk Minsch, so heet dat, hett'n Wöörd.
— Heff ik noch nüms op wetten höört!


Raadslag an den Profi-Killer

Wullt du din Riekdom krasser mehrn,
muttst du mehr Minschen massakreern.


Bankenkrise un Grekenland

Betahlt wi nu de grode Reken
för Banken un marode Greken?

 

Riederglück

Dat dank ik di, min Schimmelhengst,
dat du mi'n Stück vun'n Himmel schenkst!

 

De Vadder vun de floogbegeisterten Jungs klaagt

Jümmers, wenn ik de Flegel söök,
öövt ja de Flegel Segelflöög!
Wenn ik schon düsse Flögel seeg,
wünsch ik, dat da en Sögel fleeg.

 

De Slagernacht in Bad Sebarg

För Rotten is de Slagernacht
en Lecker-Müllfreet-Nagerslacht.

 

To hitt!

De allto dicht bi'n Aven steiht,
sik denn de 4 Bookstaven eit.

 

Inlineskater op'n Börgersteig

Du Dussel, treck din Rollen in
un düüs nich in de Ollen rin!

 

Nich jümmers olle Zoten

Vertell nu mal en frischen Witz —
süss slah di in de Wischen, Fritz!
Wenn du bloots över Stöhnen grünst,
wünsch ik, dat du in'n Grönen stünnst.

 

De Revoluschoon kümmt!

Een Dag sik noch de Banker höögt,
de morgen sik vör'n Henker böögt!

 

Jähzorn — So is Ruth

För Godes sett sik Ruth in, wo
se kann — dat kannst vun wieden sehn.
Man laat ehr bloots bi Wut in Roh!
Dat mööt ehr dunklen Sieden ween.

 

Nee, nee!

Nich, dat ik mi an'n Mann nix kehr —
man bloots, min Keerl, de kann nix mehr!

 

 

Dat Nobelrestaurant floreert nich — Raadslag an den Kook

Du muttst din Standards re-codeern.
Laat doch dat blöde Dekoreern!
Staats Blomen in Bukette pieken
schast lever in de Pötte kieken.
Dat du mal richtig Kasse maakst,
is nödig, dat du masse kaakst.
Un kannst du denn noch billig ween,
denn kaamt de Lü op willig Been.
Un sünd se richtig smachtig eerst,
süh, dat du Brood för achtig smeerst
un ok noch mit de Kinner danzt!
Un dat du eddel Dinner kannst,
hölpt nix, wenn du so'n lütten Klecks
vun Stippe vun de Klüten leckst!
Wees riev! Maak Pommes, schütt en Liter
Ketchup rop för de lütten Schieter!
Denn kaamt hier ok mehr Kunden rop.
Geiht dat nich in din runden Kopp?

 

 

Urlaubsneid

'keen Ferien in Juli maakt,
dör Kreta op en Muli jaagt,
Football an fremdländsch Oorten kickt
un bloots na Huus mal Koorten schickt,
kann so — dat kannst vun Wieden seggen —
tohuus keen fründlich Sieden wecken!


   

Drapen in de Frömde

Wat, kümmst du ok vun Balve her?
Da drinkt wi op! En Halve Beer!

 

   

De Macho

Nix will ik as de schickste Deern!
Warr mi nich üm de Dickste scheern.

 

 

Hunnenriemels: Striet in'n Hundewoold

wat doon, wenn sik in'n hundewoold
de hund en grote wunde haalt?
spaaß wöörst de hunn'n ja günnen, bloot
wenn se sik an de plünnen goht
un een den annern knaken brickt,
sünd beed, wiel knaken braken, knickt.
denn röppst: "in'n moors, min söter, kick
ik di!" da trollt de köter sik.

 

 
   

Kattenriemel

Twee Katten, beed mit mit suern Blick,
besnopern un beluern sick —
de een kriggt Bang. "Mau!", röppt se luut,
"ik glööv, du stinkst!" Denn löppt se rut.

 

 
 

De ästhetische Deef

De Smuckdeef smückt mit stahlen Keden
an sinen Lief de kahlen Steden.

 

 

Grillfrust

Den Regen ik mit Willen grull,
wieldat ik lever grillen wull.

 

 
 

Nich kleckern, klotzen!

Wenn ik för 20 Mannen kook,
vun Koffie ik fief Kannen mook.

 

 
   

Ertappte Kassbeerdeeven

Vun'n Kassbeerboom weg flücht de Lünken
op't Schuppendack. Wa lücht de Flünken!

 

 

Wohrschuug!

Du schast in'n Summer-Sünnendunst
nich as en Dummer sünnen, sunst
kriggst Sünnenbrand, un Wehdaag droht.
Bliffst dree Daag rood, hest dree Daag Woot.


De Aarnkroon

'keen will de Welt ehr Lasten heven?
'keen will in Stress un Hasten leven?
De Welt lett as en Giesterbahn.
Da kannst meist nix as biester gahn.
Wi seht uns nich as Gasten hier,
wi kennt bloots Ehrgeiz, Hasten, Gier.
Bald huckst in't Eck un starvst, en Hund.
— Hollstopp! Nimm di in'n Harvst en Stund:
De apen Himmel töövt op uns.
Wi sind meist nich in öövt opstunns,
man bi all Welt ehr kranken Doon
bindt wi doch to Aarndank en Kroon!

 

Maien-Arger

Mit Pollen maakt de Maand vull Weel
dat Hus, in dat wi wahnt, vull Mehl.
Staats Blödenstuff to fegen, wüllt
wi dat, wat Woold un Wegen füllt,
nich an de Schiev, op't Wagendack,
dat höllt us Nacht un Dagen waak.


Mars-Riemel

Snackt de Marsianer Platt,
sett he den NASA-Planer matt! —
Mit hunnertdusend Fragen wullt
de Minschen na Planeten griepen.
Nu över'n Mars de Wagen rullt.
Un wi hier bangt: Wi grepen Nieten.
De Marsminsch seggt: Gah man to Foot!
Man dorna is keen Fan tomoot.


Vörjohrs-Arger

Wenn de Snee nu drippt un daut,
Hoochwater uns dippt un drauht.
Un wenn an'n Boom al Knuppen sünd,
Allergiker fein snuppen künnt.

 

Ooster-Schüddelriemel

Wenn ik so op mien Rasen huuk, stiggt in de Nees mi Hasenruuk.
Ik kiek mi üm: Wo spöökt de Haas? Verstekt he sik? Em höögt de Spaaß.
He sluupt dör'n Tuun na Meiers Goorn! Dor schall mi een en Geier smoorn!
Wat sünd ji doch för'n fulen Klub! Jumpt rut nu ut juun Kuhlen, flupp!
Ji Hasen in juun Fellerkuhlen, schallt Eier denn in'n Keller fulen?!
Staats sik in'n Goorn bi Meier aalen, schallt ji man beter Eier malen!


Tja...

Hett de arme Slucker Zecken,
is dat ok keen Zuckerslecken.

Schietweder

Sneeflöckchen, de fladdert lütt,
Regenschuur, de pladdert, flütt,
an'n Grund, da daut de Dreck,
un intostörten drauht de Deck.

 

To Niejohr

Dat niege Johr, dat steiht nu redig!
De niegen Daag sik reiht nu stedig.
Begrööt dat Johr mit Knall un Buddeln!
Gaht danzen op en Ball un knuddeln!
„Prost Niejohr!“ klingt un röppt dat luut.
So’n Johr is kott – bald löppt dat rut.

 

Winterspeck

Atze prahlt, de Winterspeck
mutt nu bald mal (spinnt er?) weg!
He seggt, he weer op gode Bahn,
will in de Muckibode gahn.
An't Loopband un an'n Stepper klöönt
he bloots, as'n ole Klepper stöhnt
he, schall he de Gewichten heven —
nahst kann he vun Geschichten weven!
Twoors is he avends noch nich dood,
doch weet he: dat deit doch nich Noot!
Denn gifft he uns sien (spinnt er?) Woort:
Vun nu af bloots noch Wintersport!

 

In'n Lent

Holl du den jungen Fent lever
op Afstand! He hett Lentfever!
Hett em eerst de Lent tofaat,
is dat för den Fent to laat,
wille Schuer krüppt 'n hooch,
un de Bengel — hüppt in'n Kroog.

 

Tiedümstelln

Wenn in’n April mi schubsen wullt –
dat’s wat, wat ik woll wupsen schullt!
Man Tiedümstelln? Dat geiht nich an!
Kann mit Komodigkeit nich gahn!
Dat ik den Wecker vörstelln do,
is, wat ik bloots in Störfälln do!
Ik segg ju, laat’t de Klock in Roh!
Sünst landt mit Büx un Rock in’n Klo!
Wenn ji dat man bloots checken wüllt,
dat ji mi nich fröh wecken schüllt!


Hein klaagt: "Op unse Maienfier,
dor gifft dat gor keen Feien miehr!
Staats smucke Fei'n to'n Danzen weern
bloots Hexen dor un Wanzen, Deern!
Wa wünsch ik mi, en Fei to möten!
Legg ehr den ganzen Mai to Föten."


Make love, not war!

Wi schulln, staats jümmers Kriegen föhren,
lever mal dat Friegen kören!
De Minschheit mit ehrn kloken Kopp
maakt Panzers un Raketen Schann.
Man 'keen sik nich üm Koken kloppt,
bloots Leevde maakt, nich scheten kann!


Halloween alternativ

Staats Körbsen eenfach uttohöhlen,
weer't beter, ehre Huut to öölen
un dorna mit ehr Fangen spelen,
dat flutscht so schön, is grulich ok,
un dorna kannst bi'n schulig Grog
nakieken, wat na't Fangenspelen
nich Vörrertähn un Spangen fehlen!


Rosetta-Sonde landt op den Kometen

Wokeen is't, de op Weltall-Töörn
opletzt op en Kometen landt?!
De lüttst Erfolge tellt al! Wöörn
wi dorbi nich bi't Geld mallöörn?
Bloots de mit de Moneten kann't!

 

Franz sien wilde Johrswessel

Wo dat wohl unsen Franze geiht?
De Wiehnachtstied mit bunten Töllern,
mit Kinnerglück, de ganze Freid —
Silvester denn mit Tunten böllern —
dat is, wo't unsen Franze geiht.

Grekenland: Trüch in de Antike?

De Greken hefft keen Pennig. Man
dat heet ok: Koolt blifft mennig Pann,
arm Lüüd mööt in de Röhre kieken.
Doch sünd de Profiteure Rieken.
Wenn se ok Pleite-Greken sünd
un nich veel döögt — ik seh keen Gründ,
dat allens bloots de Stackels tahlen.
De Rieken hebbt ehr Tackels stahlen!
De Rieken reddt — so geiht’e Plaan —,
de lütten Lüüd laat pleite gahn!
Wat is en groot Geschicht di nütt,
wenn se vör Armoot nicht di schütt?
Diogenes uns mahnen will:
Schiet is’t, dat Tunnenwahnen, Müll!


 

Grillfrust II
Hein seggt to sien Greten:

"Hest ok so'n Smacht? Ik weet en Grill..."
— En Grill is nich, wat Greten will!


   
   

Wintersaat

Ik seh an jede Stratensied,
wo Kreihn üm frische Saaten striedt.
Is dat, üm wat se strieden, Saat?
Orr is düt sachs en Siedenstraat?

 
Harvstlich Schüddelriemel

Oktober driggt en güllen Hoot;
man liekers doot poor Hüllen goot,
denn avends warrt dat koolt. De Hüll
gifft Warms. All anner hoolt de Küll.

 

     
 

Wiehnachtsspeck

Schenkt kreeg ik ne runde Pann,
freet mi söben Punde ran.
Nu segg bloots: Kannst mit Rundpannfreten
di wirklich söben Pund ranfreten?!


   
     

Fitness

In'n Fitnessclub bringt sik de Stackeln in Form,
dorna speelt se Helden bi "Fackeln in'n Storm".


 
   

Lichtverschmutzung

Wenn ji hierher Laternen stellt,
süht nümsnich mehr dat Sternentelt!
Ji schallt hier keen Laternen stelln,
denn wi wüllt lever Sternen telln!

 

 
     

wat rechtens weer

Wöör hier ener Kinner schännen,
lehrt he bald den Schinder kennen.

 
  Schietweder II

Wullt du de Roh mal plegen, rattert
de Wind vun buten, Regen plattert —
schall he nich dör de Däker sacken,
muttst du bitieden seker dacken.
Dor drauht en koolt „Luftmassengrenz“ —
Bringt sachs in de Gruft Massen. — Lenz!
Maak mit dien Sünn mien Stirbel worm!
Man nee, nu kümmt en Wirbelstorm.
Dat ritt in Krüüz un Nacken, je!
Helpt dor noch warme Jacken? Nee!
Is jedeen, den wi kennt, nu lahm?
Och leve gröne Lent, nu kaam!

 

   
   

Baden in'n Maimaand

Wat hebbt wi för en hitten Mai!
Gifft't bald de Oostsee mit'n Hai?
Wenn Sünn dat Thermometer bitt,
nehmt wi de Sünncreme beter mit!

Hett nu dat Thermometer Been?
Dat stiggt un stiggt! Weer beter, meen
ik, wenn de Mai sik milder wies.
Den Mai findt wi doch wilder mies

De Amsel singt in klore Töön,
wenn ik mit di an't Tore klön.
Dat Schöllkruut blöht; sien gele Sood,
warrt seggt, deit Lief un Seele good.


 
     

Streitkultur

Wenn een den annern "Luder" röppt,
de Kraam bald ut'n Ruder löppt.


 
  Football-Schüddelriemel

Wat nütt de schöönste Gruppensieg,
wenn ik bloots Watersuppen krieg?
Opletzt warrt de Champagner mien.
Dorför riskeert so mancher Pien.
Schall achterna de Proppen knalln,
mööt Bäll vun Fööt un Koppen pralln!
Wullt stolt du in Pokale nicken,
musst eerst di in't Finale kicken.
Dor köönt in't Ölbenmeterscheten
sik denn de besten Scheter meten.
Wüllt höpen, dat de Beste winnt,
den Steern sik an de Weste bindt!


   

He meckert över't Eten

Is di villicht de Quarkstollen
verkokelt orr to stark quollen?
Staats Quarkstolln oder Butterkoken
kannst du en Törn per Kutter boken,
de hebbt ok en Büfett to beden!
Un büst du nich ahn Bett tofreden,
denn geiht dat Pizzalevern best,
wenn di vun'n Pries nich bevern lettst.
"Du solltest lieber Cracker machen!",
so höörst du dienen Macker krachen.
Mook em en Broot mit lecker Mett,
dormit he dat Gemecker lett.
Hest denn noch mit dien' Macker Knaatsch,
denn klopp ut düssen Knacker Matsch.


     
   

De Marderballaad

Op mienen Böhn de Marder huust,
de Eier bi Fru Harder muust.
Na wenn ik dat Fru Harder mell,
schickt se em in de Marderhöll!
Nich een bloots wöör Fru Harder morden,
nee, se killt ganze Marderhorden!
Bloots dat se hüüt na Warder müss.
Oha! Wenn dat de Marder wüss!
Dor fohrt se op den hogen Weg. (Dat schall de "Highway" ween :-)
Du sühst bloots noch ehr Wogenheck.
De Marder in de Köök nu sliekt,
na Eten op de Söök nu kiekt.
Süh em dör Schapp un Kannen wöhlen,
dör Buddeln, de in Wannen köhlen,
as weer de Köök en Vagelnest
un nixnich niet- un nagelfest!
Bit he Fru Harders Wogen höört,
hett nix in't Huus mehr hogen Weert.
Man denn man fix, mien leve Deert,
sünst lehrst du, wat een Deve lehrt!
In Amidam falln wöör se lies,
de Fru, warrt dat Mallöör se wies.
Och arm Fru Harder, wat'n Schiet!
— De Marder huscht in'n Schatten wiet.
He winkt mi, wiel wi Frünnen sünd,
is he man ok keen Sünnenfründ.
Nich dat ik mi an't Winken stör —
wenn he bloots nich so stinken wöör!

 

 
  Wiehnachts-Schüddelriemel

In de Adventstied gröönt de Kranz.
Den Wiehnachtsavend krönt de Gans.
De Dannboom lücht in't Karsenlicht.
Wat hüüt woll Opa Larsen kriggt?
He wünscht sik Freden sünner Pien. — Den Wunsch
deelt wi mit em, liek as vun Wien den Punsch!

   
           
...vun Karin Albrecht  

De Hahn, mit kräschen Flüchtenschlag,
stört't up den Köter los un schlüggt 'n flach.

 

 
 

An'n Räkner ick to Maientied
verscheedene Dateien mied.

 

 

Warüm hett dit Stickenpiert
so väl kläwrig Pick in'n Stiert?

 

 
   

Jung' Lüüd sülln sick bi't Kennenliehren
nich blots an ehre Lennen kiehren!

 

  Klimaschutz, seggt de Politiker, is'n fien Sach',
blots, betont he, wier dat nich grad sien Fach.

 

 

Dat Rezept von Herthas Kliebensupp
strahlt ut hüüt de Pro 7-Club.

 

   
 

Bewerbung

Kann ümgahn mit'n Taschenräkner
un bün ok'n ganz raschen Teekner.
Kann räden goot an't "Tölefon",
schriew af un an 'n Feuilleton...
Ick ward'n goden Fachmann sien,
ward maken jedeen Sach' man fien.

 

 

In Mecklenborg-Vörpommern

Jung' Lüüd hemm' leider hiertaulann'
kuum eene Stell för 'n Lihr tau Hann'.

 

De Buer föhrt mit sienen Lerrerwagen
rut up dat Feld bi alle Wärerlagen.


Lüüd, de in ehr Supp spucken,
moeten denn ehr Spuck supen.


Bi Storm seih ick mien' Stangenbohn'n
in'n Goorn stets mit Bangen stohn.


Dor moet eener fix ut de Latzhos',
nu geiht dörch de Stadt siene Hatz los!